If you're talking about my life, you're only wasting your own time

我仲意．．．．．．．．．．．．．．

有D人....
沒有"標準"的美人胚子..
但佢梗有自己既吸引力... 繼而轉化為獨一無二屬於自己既"美麗"

例如.... 走火入魔前既傅穎.... 寸寸地好似一世都唔要人幫既李籠兒...
咩造型都夠膽死既莫文蔚.. ......唯佢獨有孖Ｘ腸舒淇
型爆既明哥..... 充滿智慧既千嬅... 花的姿態演唱會入面既陳綺貞


而且.....
好多人人都話靚既.. 我通常都係 I DON'T THINK SO.... （吹呀）
鍾嘉欣呀... KELLY CHAN 呀（我什至覺得佢兩個好ＵＧＬＹ，吹呀）
才女呀．．劉心悠呀‥林志玲呀‥綾瀨遙呀‥

我知‥‥通常我講完上面既野ｄ人既回應係：下~~~~~~~~~~~~~~~~~~~~
然後就話我仲意既野特別”騎呢”呀~~~口味獨特呀...你d taste真係怪怪地

就好似6年級果時..
果時舒淇岩岩從良... 我已經覺得佢好靚
但此話一出... 即刻俾周圍既同學批鬥.... ：唔係丫嘛... 見到佢個咀就想嘔啦

其實... 我喜歡既野只係同你地（或者大眾）唔同ｄ姐
咁就落得如此下場？

或者下次當你仍然覺得我既口味奇異
一係，你同我絕交啦
一係，你可以問下我點解仲意，然後先加上自己意見。

簡單最浪漫的方大同

我曾經好鬼死迷你...係soulboy+愛愛愛+未來既時候
但亦因為橙月同timeless放棄你
呢一刻我後悔了。
我痛恨我一次又一次錯過你既演唱會
下次... 下次.......... 一定可以.....
（祈求你下次演唱會咪再請ｆｉｏｎａ做嘉賓）

逐格鬥 死人

琴日因為有免費飛..

去左tvb睇逐格鬥錄影... （生平第一次.. 我諗應該唔會有第二次）

 

原來.. 係電視睇到既... 只不過係現實既4分之1(都唔知有冇)..無論各方面..
 
例如:
 

• dodo姐真人唔似整容失敗... 睇得出本身個樣唔差... 不過佢瘦到成條柴咁
• 占同奴表面白痴.. 其實兩個都好sweet..好體貼..
• 鏡頭下既占占其實好靜..內歛...（我仲意呀）
• 我地係電視睇落佢地玩得好開心..其實佢地已經好攰好肚餓..其中一方仲諗住扮輸早d玩完早d收工（dodo姐話：我都想呀）
• roll機前5秒..奴打"喊路"...dodo姐同占係咁流鼻水．．但一roll機佢地即刻冇事

我地由電視上面得到既快樂... 其實係健築係佢地既痛苦上

by the way..

you really hv "sth"~~

Before Sunrise and Before Sunset

 ｎ年前聽到有套戲個故事內容係咁既：

一名美國青年Jesse(Ethan Hawke飾演)和法國女孩Celine(Julie Delpy 飾演)在歐洲旅行時於火車上相遇，他們決定一起在維也納下站，共度一個難忘的夜晚。


但ｎ年前我仲未知道呢套戲既戲名。
幸好，過了ｎ年，我又唔知係邊度又聽到人介紹呢套戲
我終於要佢叫咩名：Before Sunrise
中文譯名有兩個，叫：愛在黎明破曉時　同埋　情留半天（聽到都想嘔）
 

 
 
 
 
 
 
 
 
 
我去影碟鋪搜尋下呢套戲既ｖｃｄ
發覺呢套戲冇係香港上映過
而且只係出左ｄｖｄ，冇ｖｃｄ
由於果時都岩岩先開始興ｄｖｄ
所以ｄｖｄ特別貴，＄１７０

fine，照買。

jesse與celine係無交換聯絡方法既 sunrise分別了。
未嘗唔係一個HAPPY ENDING
如果兩人繼續發展落去，
最後難免會因為普通情侶問題而分手，然後變返陌生人。
再者，更加唔會有９年後既Before Sunset。

冇錯，９年後，兩人又係巴黎重遇。

jesse同celine 會長大，導演長大，觀眾亦然。

jesse與celine 經歷過好多
jesse 結左婚
celine已經唔再係學生+ n次感情失敗
歲月不留人.. celine都老左好多啦
相反jesse 額頭既皺紋更顯男人味
重點係，重遇既同時，
jesse又要係before sunset前飛走


結局仍然係留白，冇交代過jesse既去留

唔洗交代都知，
jesse已經俾celine作既A Waltz For a Night溶左

朋友

好朋友一號 ..

數數手指.. 原來我地已經識左19年啦

我從來都冇同過任何人講過..

其實我個童年不快樂.. 坦白講.. 你都要負d責任

但係

就係呢個不快樂童年成就左我地依家既關係

即使我地係唔同中學

但我地每個星期都至少見面一次

得閒會落街行惠康

可惜

人大啦

你有你工作 我有我忙碌

見面次數越黎越少

由每個星期見一次

之後兩星期見一次

一個月見一次

到最近... 兩個月見一次

仲要只係夾硬抽空食個LUNCH

我知道人大左呢D情況邊個都避免唔到

我唯有 好好記低最近發生既事

等下一次見面全部話哂俾你知


嗯,, 我認為真正既好朋友

係相處既時候即係傾到詞窮.. 都唔會感到Dead air

因為我地既心係連住既

如果你真係感到dead air既話

咁對方其實只係一個吹水既朋友

紫色是我的

我喜歡紫色
可惜紫色的東西好多時唔係最靚... 什至好娘


紫色item,, 我唔係有好多，只有：

• 水樽（我去到邊都帶住佢）
• 袋

不過貴精不貴多
最近，有新增
嗯，係佢啦...

即使要專登出去太古攞
即使ａｄｉｄａｓ出左勁巴閉既ｓｔａｒ　ｗａｒ系列
我都係要佢

另外，我見到佢地，
我都會會心微笑

gain and lose

唔經唔覺, 呢份part-time做左年幾

gain wt?

• 微薄收入（好過冇，因為我得好少零用錢，而且，因為有收入，我先可以過ｄ比較奢侈既生活）
• 好同事（我諗 .. 可能冇individual commission關係啦..by the way~好同事真係好難遇到架）
• 真係明白到出黎做野堅係辛苦，
  
  以前年少無知，以為sales冇野做，但係你係客入到去，
  
  ｓａｌｅｓ唔會話你知佢地其實好攰，
  
  係ｓｅｒｖｅ你既同時，個倉有千萬箱貨未拆，
  
  你叫人拎貨，其實件貨係好高好入既地方，
  
  千辛萬苦咁拎出黎點知你個仆街話唔要
  
  
  

有得必有失...我失去：

• 健康（以前既我，真係好少發燒 ，就算有發燒，食粒藥訓一陣就得，
  但自從返左呢份工，經常發燒，仲有肺炎‥‥仲未夠，近排成日返無飯食既更，
  ６個鐘或以上冇飯食，就算有，都係偶爾入倉攞貨咬一啖，你覺得消化到咩？
  就係因為咁，依家成日胃痛）
• 皮膚越黎越差... 我實在唔明點解要化妝..
  我諗每個人唔會因為個sales有化妝睇落精神d而決定買野掛？？？

總括黎講
除左收入之外,,,
其他既.. 其實用錢都買唔到

哭著笑 坐著等 站著睡 簡直是病態

昨天 我去左林宥嘉係朗豪坊 CD Warehouse舉行既簽名會（我以為係簽唱會呀仆街）

anyway, 我只係想見下偶像真人姐

大會規定：

一定要係ｃｄ　ｗａｒｅｈｏｕｓｅ購買感官世界第二版先可獲得簽名証

而林宥嘉亦只會簽係第二版既歌詞簿上面（第二度都唔得架，唔知點解）


作為超級粉絲既我，第一版一出第一日我就買左啦

第二版依ｄ咁呃錢既產品我死都唔買呀，除非發左達啦


well~~~~~~~~~~

但我覺得我冇買第二版呢個決定係正確

因為：

等簽名既粉絲係門口等

我就係ｃａｓｈｉｅｒ等

林宥嘉係ｃａｓｈｉｅｒ個倉度行出黎

ｙｅｓ！佢係無神神係我毫無準備之下係我面前行過

我堅信我同佢有眼神交流 - 兩秒

有簽名証粉絲係門口死等爛等換黎只有林宥嘉同佢講一聲：謝謝

而我，就近距離見到佢對住無限數量粉絲講無限次多謝

我當佢係同我講架啦～


不過，當我以為我已經好瘋狂既時候

一山還有一山高：

有粉絲可能痴住友人而一齊有得排隊

而佢只係帶左個ｃｏｖｅｒ出黎

但林宥嘉只係簽係歌詞簿上面

所以佢即場又買多左隻 .......................


仲有一個

應該係粉絲隊長

當林宥嘉大聲話只準簽名唔可以握手

佢就懶係維持秩序‥懶係幫ｙｏｇａ重複多次

就好似回魂夜入面發現李氏夫婦係門口

然後返到黎扮哂野果個李力持咁樣



後記..

• 雖然我有帶相機影相.. 但我個人係唔依賴佢既，
  因為我隻眼同個腦已經係最好既相機
• 林宥嘉唱歌個樣好似未訓醒咁，其實佢對眼好精靈（男人老狗要咁大對眼做咩呀）
• 非常感謝ｋａｒｅｎ陪我，佢陪我閒逛行左千萬次既ｍｋ，冒住上鏡既危機，忍受住cd warehouse既悶熱................ 除左賜佢親吻我既右腳之外，我真係唔知可以做咩啦